Davao City – Sikop sa gilusad nga manhunt operation sa awtoridad nahitabo sa Muslim Village, Ecoland, ning syudad sa Davao, niadtong Mayo 22 ang usa ka nurse gumikan sa gikalambigitan niining kasong kriminal partikular sa Large Scale Illegal Recruitment.
Pinaagi sa warrant of arrest nga pinirmahan ni Honorable Judge Ronald Tolentino, RTC 11, Branch 52, malampusong na-aresto ang suspek nga si Vera Flor Delos Reyes Manuel, 49-anyos, minyo, ug residente sa Ladislawa Village, Buhangin, Davao City.
Sa report sa Talomo Police Station, mihikay og pormal nga reklamo ang pipila ka mga complainants niadtong Agosto 2016 sa Department of Justice (DoJ) batok kang Reyes ug sa laing duha pa ka mga respondents human nga gipangsaaran kini nga makatrabaho sa mga nasud Japan, Australia, ug Germany isip butchers ug meat processing workers bugti sa kantidad nga Php 30,000.00 – Php 120,000.00 alang sa pagproseso ug bayad sa mga dokumento.
Apan pipila ka semana human sa saad, nasayran sa mga complainants nga dili awtorisado ang mga respondents nga muproseso sa recruitment sa mga Pinoy abroad.
Kasamtangang nakadetinir na sa Talomo Police Station ang maong suspetsado alang sa dokumentasyon ug tukmang disposition.
RadyoMaN Jason Amisola
