Davao City – Giklaro karon sa Department of Agriculture (DA-XI) nga free enterprise ang pagpamaligya og tanum karong panahon sa pandemic.
Atol sa interbyu kaniya sa Straight to the Point Morning Edition, gibutyag ni DA-XI Regional Director Ricardo Oñate Jr. nga dili lakip sa mga nag-unang panginahanglanon ang mga tanum di susama sa mga pagkaon.
“Basin muabot sa punto nga ingon ana (i-regulate tungod naay overpricing sa mga ginabaligya) pero sa karon free enterprise (ang plant selling). Nya di man pod siya nagpasabot nga panginahanglanon pero kung naa pod silay ika-sell out nga ana nganong pugngan man nato,” segun niini.
Matud ni Oñate nga dakung tabang ang plant selling sa katawhan ilabi na karon nga daghan ang naglisod ang kahimtang panahon sa pandemya.
“The point is naa na sa katawhan to appreciate the beauty of nature. Nakatabang man pod sa uban (labi na karon nga pandemic) kay naningkamot man pod magpadaghan (og tanum). Kung naay mupalit, it’s up to them dili nato sila ma regulate although naay uban naga ingon nga ginapanghatag ra man na ‘tong una,” saysay niini.
Samtang giklaro usab sa labaw sa DA-XI nga walay mandato sa Bureau of Plant Industry (BPI) OIC Director George Y. Culaste nga i-regulate o buhisan ang plant sellers isip tubag sa mga nabalakang katawhan.
RadyoMaN Jason Amisola
