Davao City – Walay nakitang problema ang usa ka Davao financial adviser kalabot sa kinaiya sa usa ka tawo nga pagka ‘risk taker’ sanglit kitang tanan makonsidera man nga mga risk takers.
Sa programang ‘Straight to the Point’ uban ni RadyoMan June Duterte, gisugilon ni Jan Ocampo, founder sa ‘The Present’ video blog ug usa ka iladong financial advisor and work competency expert, gipasabot niini nga ang tinuod nga ‘risk taker’ nasayod ug nakasabot sa mamahimong resulta sa iyang gisudlan nga investment scheme.
“Naay uban muingon nga ‘risk taker’ sila, pero once mawala, matumpag dayon iyang kalibutan, buot pasabot gina-angkon niya ang ‘risk tolerance’ pero gamay lang kay ang iyang nakita ang tubo lang ug dili ang risk management,” segun ni Ocampo.
Dugang ni Ocampo nga kung adunay plano ang usa ka tawo nga mosulod diha sa investments opportunities, gikinahanglan sutaon usa niini ang legalidad sa usa ka kompanya or business venture, sayron kung gi-unsa pagpalambo sa kwarta or kun unsaon sa pagre-invest ang ilang capital ug i-invest lamang ang kwarta nga kayang madawat sa buot kung mawala man kini sa ngadto-ngadto.
“Never ever invest in anything that you do not understand and only invest the money that you can afford to lose,” sugyot sa iladong vlogger.
Dugang sa maong financial ug business advocate nga panahong adunay madawat nga kwarta, angay tun-an ang hiyas sa hustong pag-budget diin klaro kun asang puntoha or matang sa expenses nimo itagana ang imong available funds.
“Pag naay mosulod nga kwarta, dapat kabalo na ka, naa na kay plano daan kung asa nimo ibutang ang kwarta – unsay gastuson nimo, pila ba sa tubig, pila imong ipadaplin para makatigom ka, pila imong ipadaplin para naa kay ika-invest sa mga butang, kinahanglan gyud siya og structure,” panapos nga pamahayag ni Ocampo.
RadyoMaN Jason Amisola
