Davao City – Isip pagpangandam sa mga dili matagna nga kalamidad, kinahanglang adunay igong kahibalo ang katawhan kalabot sa angay buhaton sa aktwal nga sitwasyon.
Sa interbyu sa DXDC 621 RMN Davao kang Franz Irag, Operations Officer sa Office of Civil Defense (OCD) – Davao City, gibutyag niini nga angay gayud nga muapil ang tanan sa mga emergency preparedness drill sama sa earthquake, tsunami ug flood drill nga ginapahigayon sa matag lokalidad ug kini angay nga seryosohon.
“Kinahanglan gyud ‘ta mag-apil pirmi ug seryosohon ang mga emergency preparedness drills sa inyong lugar,” saysay ni Irag.
Ikaduha mao ang pagbaton sa matag pamilya og family preparedness plan o ang kahibalo kung asa ang mga evacuation centers, unsa ang emergency kit/materials nga dal-on sa pamilya sama sa ‘Go Bag’.
Usab angay nga sigurohon ang kalig-on sa balay labi na kadtong mga anaa sa faultline nga delikado sa kusog nga linog diin unang ikonsidera mao ang saktong materyales nga gamiton sa katukoran niini.
Labaw sa nga tanan, angay usab nga adunay koordinasyon sa matag miyembro sa pamilya kung asang dapita naglakaw ang ginikanan ug kung kinsay nabilin sa balay, pagsiguro sa komunikasyon sa matag miyembro sa pamilya ingon man komunikasyon sa Local Government Units (LGUs).
RadyoMaN Kirby Manzon
