Davao City – Gipahimangnoan karon ang mga residente sa mga lugar dinhi sa Davao region labi na kadtong duol sa kasapaan nga magmabinantayon sa palibot panahon sa mga pag-ulan aron malikayan ang mga pagdahili sa yuta ingon man mga pagbaha ug pagtaas sa level sa tubig sa kasapaan.
Kini ang gisaysay ni Franz Irag, Office-in-Charge sa Office of the Civil Defense (OCD)-XI sa pakighinabi sa DXDC RMN Davao human sa nasinati-ang mga pag-ulan karong panahona.
Bisan pa man, gibutyag ni Irag nga dili makaapekto sa Davao region ang Low Pressure Area (LPA) nga gina-monitor karon PAGASA, apan padayon gihapon nga makasinati og pagdag-om sa kalangitan ang tibuok rehiyon.
Gibutyag usab sa Office-in-Charge sa OCD XI nga aduna nay mga areas sa rehiyon nga adunay nay issuance sa landslide threat advisory sa Mines and Geosciences Bureau (MGB) nga kinahanglang makig-alayon kanunay sa local Disaster Risk Reduction and Management Council (DRRMC) aron sa pagpatuman sa precautionary measure kung gikinahanglan.
RadyoMaN Kirby Manzon
