Davao City- Padayon nga nanawagan ang Office of Civil Defense kun OCD XI ngadto sa mga residente nga nagpuyo duol sa delikadong pagdahili sa yuta sa Shrine Hills ug Diversion Road sa Barangay Langub atbang sa karaang dumpsite ning syudad sa Davao nga mubakwit ug magpalayo sa area.
Ginahimo karon sa OCD XI ang closely monitoring sa maong area ug pinaagi sa Davao City Disaster Risk Reduction and Management Council (CDRRMC), nakig-koordinar usab sila sa Department of Public Works and Highways kun DPWH XI alang sa dugang pag-monitor.
Kini ang sigun ni (OCD)-Davao spokesperson Mc Adrian Cubero atol sa interbyu sa DXDC RMN Davao diin sumala pa bisan gipatuman na sa CDRRMC ang pre-emptive evacuation, ubay-ubay ang nihawa apan nibalik na sab sa lugar.
Pahimangno sa OCD XI sa katawhan nga dili mabal-an og kanus-a matigayon ang pagdahili sa yuta hinungdan ilang ginapakusgan ang pagpasabot ngadto sa mga residente nga magbinantayon kanunay ug kung mahimo muhawa nalang sa area ilabi na nga ting ulan karong panahona hinungdan sa paghumok sa yuta.
Pahinumdom niini nga dili lang lokal nga gobyerno ang responsable sa pag-atiman sa katawhan og kaluwasan ang storyahan, ang katawhan mismo dunay responsibilidad nga mag-andam kanunay aron malikay sa bisan unsang disgrasya tungod sa kalamidad.
“Diri sa OCD together with local DRRMCs, naga-aim gyud ta nga wala gyuy casualties in any form of natural o man-made ba na nga calamities,” sigun ni Cubero.
RadyoMan Renz Barbarona
