Davao City – Anaa na karon sa ‘blue alert status’ ang gihimong pagpangandam sa Office of the Civil Defense (OCD-XI) tungod niining nasinatiang mga pag-ulan sa Rehiyon 11 dala usab sa Bagyong Urduja nga anaa karon sa Visayas area.
Sumala ni OCD-XI Director Leoncio Cirunay, nakadawat sila ug direktiba gikan sa higher headquarters nga patas-an ang alert level gikan sa white ngadto sa blue alert status alang sa pagpangandam sa posibleng matigayong mga pagbaha ug landlisde tungod sa mga pag-ulan.
Tungod niini sumala sa director sa OCD-XI, nagpadala na sila ug mga pasidaan sa mga Disaster Risk Reduction Management Council (DRRMC) sa tibuok rehiyon alang sa maong ang-ang sa pagpangandam.
Giingon pa ni Cirunay, preparado na ug andam kanunay ang mga buhatan sa gobyerno nga maoy moresponde sa bisan unsang kalamidad nga matigayon dili lamang sa mga linog ingon man pagbaha ug landslide pinaagi sa mga kahimanan nga gamiton aron magiyahan dayon ang katawhan sa pagbalhin sa mga luwas nga lugar o evacuation centers nga nakamungtar nang daan sa tagsa-tagsa ka mga lugar.
RadyoMaN Bernard Pantallon
