OCD-XI: Kapin 50 ka dalan sa Davao Region, apektado sa kalamidad

Davao City – Gibutyag sa Office of the Civil Defense (OCD)-XI nga muabot sa kapin 50 ka mga karsada o dalan sa Davao Region ang naapektuhan sa pagbaha ug landslide tungod sa Trough of Low Pressure Area (LPA).

Sa interview sa DXDC RMN Davao kang Ednar Dayanghirang, Regional Director sa OCD-XI atol sa programang ‘Straight To The Point’ Afternoon Edition uban si RadyoMaN Bernard Pantallon, iyahang gibutyag nga sa ilang assessment, anaa sa 42 ka karsada sa Davao de Oro, walo ka dalan sa Davao Oriental ug duha ka dalan sa Davao del Norte ang apektado tungod sa baha ug landslide.

Matud ni Dayanghirang, sa maong mga dalan, adunay pipila niini nga passable, apan aduna gihaopoy dili pa maagian, diin nagpadayon ang clearing operations.

Gidugang niya nga anaa usab sa 38 ang natalang landslide incidents sa Davao de Oro ug 7 sa Davao Oriental. Sa pagbaha, anaa sa 34 ang apektado sa Davao de Oro, walo sa Davao Oriental ug 14 sa Davao City.

Pahimangno sa OCD-XI official sa publiko nga kanunay’ng mag-igmat ug makig-alayon sa ilang lokalidad aron sila maluwa sa disgrasya.

“Kitang Davaoeños, ipadayon nato ang atong pakig-alayon sa gobyerno, sa barangay, municipal, sa City of Davao, mga probinsya. Kung unsay guidance, unsay direktiba, tuman dayon ‘ta para layo ‘ta sa peligro,” pahimangno ni Dayanghirang.

RadyoMaN Kirby Manzon