Davao City – Gisaka na sa Office of the Civil Defense (OCD)-XI ngadto sa blue alert ang status sa buhatan ingon man sa tanang mga member agencies sa Regional Disaster Risk Reduction and Management Council (RDRRMC) sa Davao region tungod sa bagyong Chedeng.
Sa pakighinabi sa DXDC RMN Davao kang Leslie Francisco, spokesperson sa OCD-XI, gipasabot niini nga sa blue status, on call na mga personahe sa buhatan 24/7 ug kanunayng ‘ready for deployment’ ang nahisgutan.
“Ang OCD nga chair sa atong RDRRMC, nag raised na ta sa atong alert status sa office ug aduna nay memorandum ang tanang member agencies sa RDRRMC nga mag raise into blue alert.” segun niini.
Gipasabot ni Francisco nga sa maong status, naka close monitoring ug nakatutok sa operation center ang buhatan ug ang RDRRMC, diin kanunay usab ang ginahimong koordinasyon sa mga probinsya ug mga munisipalidad sa rehiyon.
Sa karon, matud pa sa opisyal nga wala pay gika-report nga adunay pagtaas sa lebel sa tubig apan padayong nagpahimangno ang OCD-XI nga mahimong alerto kanunay ug dili mo-kumpyansa sa panahon, mag monitor sa balita ug kanunayng makig-koordinar sa mga awtoridad.
RadyoMaN Kirby Manzon
