OCD XI nakatala og upat ka landslide sa Davao de Oro kagabii

Davao City – Nagpasidaan ang Office of the Civil Defense Davao sa mga Dabawenyo nga padayon mag-igmat sa posibling pagbaha ug pagdahili sa yuta karon nga padayon makasinati og mapanganuron ang kalangitan nunot sa nagpatigbabaw karon nga “Easterlies” nga miigo sa dakong bahin sa Mindanao.

Matod ni OCD XI Focal Person Franz Irag nga kagabii pa hangtod ganinang kadlawon nakasinati og pag-uwan ang dakong bahin sa Davao Region hinungdan sa natigayon nga pagdahili sa yuta ug pagdako sa level sa kasapaan sa pipila ka dapit sa Davao De Oro gabii.

Segun ni Irag nga basi sa ilang pinaka-ulahing monitoring, nakasinati og upat ka hugnaan sa pagdahili sa yuta ang Highway sa Maragusan-Nabunturan kagabii, apan paspas sab nakapahigayon og clearing operation ang Municipal Disaster Risk Reduction and Management Office, busa passable na kini pag-usab karon.

Hinoon, wa’y direktang sa kabalayan ug sa mga tawo ang nasampit nga pagdahili kagabii.

Dugang ni Irag, misaka sab ang level sa tubig sa kasapaan sa lungsod sa Mawab, apan, wa’y natalang pagbaha kagabii.

Dugang ni Irag, wa’y mga dapit sa Dakbayan sa Dabaw ang nabahaan bisan paman og naghatod sa kad -lawon ang bundak sa uwan ug gani wa musaka ug normal ra ang level sa kasapaan sa siyodad.

RadyoMaN Joel Viray