Davao City – Giawhag karon sa Office of Civil Defense (OCD-XI) ang katawhan sa syudad sa Davao ug kanait nga mga lokalidad nga suportahan ug salmotan ang ilusad nga Davao section sa atong Nationwide Simultaneous Earthquake Drill karong adlawa.
Sa pakighinabi kaniya sa programang ‘Straight to the Point’ kaganina, gisugilon ni OCD-XI regional chief Leoncio Cirunay nga tumong ning nasangpit nga nasudnong aktibidad mao ang pagpataas sa lebel sa kahimatngon sa tawo sa kun unsay angay buhaton una mahitabo, samtang nagapanghitabo ug human masinatian ang klase-klaseng mga kalamidad kun katalagman.
Dugang ni Cirunay nga karong alas-2:00 sa kahaponon, adunay ubay-ubay nga mga dagkung tunghaan ug kolehiyo ingon man uban pang participating government or private agencies ug establishments dungan nga mohimo’g tugbang nga aksyon agig pagresponde pananglit sa scenariong makusog nga pagtay-og kun linog sama sa gikabalak-an apan gipangandaman sa tanan nga ‘The Big One.’
Kahinumdoman nga sa bag-ong pilosopiya sa atong mga first responders, rescuers and disaster management operatives, dili lamang ‘disaster preparedness’ ang angay atong bansayon hinonoa, mas dad-on nato didto sa taas nga ang-ang nga ‘disaster resilience’ diin gikinahanglang preparado na gayud kita gumikan sa kadaghan na sa atong nadunggan ug nahibaw-an gani implementasyon na lamang ang labing gikinahanglang focusan.
Gawas sa disaster resilience, gihagit usab sa mga disaster management administrators ang nasud nga angay tutukan ang mas halapad nga konsepto o doktrinang ‘biosecurity’ kun ang atong kaluwasan gikan sa mga trahedya, emerhensiya o katalagman man-made man kana o natural occurrences.
RadyoMan June Duterte
