Sa interview sa DXDC RMN Davao kang Karlo Alexie Puerto, ang Information Officer sa OCD XI, iyang giklaro nga walay direktang epekto sa Davao Region ang pagbuto sa Mt. Kanlaon sa Negros Island niadtong June 3, 2024 sa gabii ug walay angay kabalak-an tungod wala pay na-monitor sa rehiyon nga volcanic eruption.
“Halimbawa kung pagawas sa Mainland Mindanao ang hangin, basta dili siya padulong sa Davao Region ang hangin at that time of eruption, wala kitay angay ikabalaka kung muabot diri ang epekto sa ash fall. But, kanang mga lava and anything, wala ta ana. Sa karon, wala tay mga recent recorded incidents of eruption within sa atong rehiyon,” segun ni Puerto.
Apan gibantayan gihapon ang aktibong bulkan nga Mt. Leonard Kniaseff, sa Davao de Oro. Lakip na ang potentially active nga Mt. Apo nga padayon karong gistudyuhan ang posibilidad sa pagbuto.
Sa katapusan, nagbilin og pahinumdom si Puerto ngadto sa katawhan nga sa bisan unsang kalamidad, angay maminaw sa pahimangno sa otoridad.
“Atong iduso nga unta tumanon sa katawhan kung unsa man ang abiso o mando sa lokal nga panggamhanan. Kung kinahanglang mubakwit sa mas luwas nga lugar, dili na kita magpa gahi-gahi pa,” sulti ni Puerto.
RadyoMaN Ivy Parido
