TACLOBAN CITY – Utro nga bumisita kasangkulop hi Presidential Assistant USec. Wendel Avisado han Office of the President para mabatian an mga reklamo tikang ha mga Yolanda Survivors nga nag-uukoy na yana ha relocation site Northern Barangay han Tacloban.
Aminado hi Avisado nga mayada pa mga problema ha Yolanda projects nga waray pa kasusulosyuni upat na katuig an nakalabay.
Siring ni Avisado durante han iya pakig-atubang ha mga Yolanda survivors nga ira sosolusyunan an problema ha tubig, electricity connection, drainage system ngan livelihood.
Ha problema ha supply han tubig, nakipag-koordinar na daw an iya opisina ha Local Water Utilities Administration (LWUA) para ma fast-track an na-delay nga 565 million pesos water supply project ha resettlement sites matapos nga magkamayada hin problema ha bidding.
Yana kay control na hiton Syudad an Leyte Metropolitan Water District (LMWD), positibo an opisyal nga mas masayon nga masosolbar an panginahanglanon han tubig han kada pamilya ha northern barangay.
Maghahatag liwat hin sabsidiya an National Government para maficilitate na an electricity connection ha kada balay nga ginhimo han National Housing Authority (NHA)
Masunod nga mga konsultasyon han Office of the President ha Guiuan Eastern Samar yana nga April 3, Basey Samar April 10, Carigara Leyte April 11, Isabel, Leyte April 12, Naval Biliran April 17, Silago Southern Leyte April 19.
An aktibidadis in naghihingyap nga mabatian han Malacanang an mga problema pa nga ngada yana igin-aabat han mga yolanda survivors.
Matapos an konsultasyon, igpapaabot ini ngadto kan Presidente Rodrigo Duterte.
