Sa pakighinabi sa DXDC RMN Davao kang Marcial Arobo, OFW na sa maong nasud sulod sa unom katuig, iyang gisaysay nga sama sa normal nga adlaw niya didto sa trabaho, nagsalig sila nga hinay lang kato nga pagtay-og apan sa wala damha, kalit nalang kini mikusog ug nangahagbong na ang semento gikan sa taas nga bahin sa ilang building.
“Pagkahitabo ato nga kusog na gyud kaayo siya, taranta na kaayo mi. Kanang feeling nga naghabol na ang kamatayon kay basin mahugno og kalit ang building ba. Kaingon gyud kog, Lord ayaw sa kay murag mulagpot na akong kalag,” butyag pa ni Arobo.
Dugang pa nga sa dihang mikalma na ang palibot, nagtuo siya nga luwas ra siyang makasakay sa elevator apan, na-trap kini ug gisalig nalang sa Diyos ang tanan hangtod siya nakagawas.
“Isa lang pud akong na-realize, gikan sa balay, dorm o bisan asa man ta sa kalibutan, mutrabaho ta naa gyud tay baon nga pag-ampo, prayer, guidance gikan sa taas. Ampo ta nga ampingan ta kay wala ta kabalo sa mga trahedya nga pwede natong masinatian,” mensahe pa niya alang sa tanan.
Kahinumduman nga nasinati ang linog niadtong Abril 3, 2024 sa buntag nga miigo sa Eastern Taiwan diin sa ulahing datos, siyam na ang kumpirmadong patay ug libuan ang samaran.
RadyoMaN Ivy Parido
