OFW nga gika’g Hongkong nga nakauli sa Naawan, Misamis Oriental, gisulod sa isolation room sa usa ka tambalanan sa probinsya

52

Gisulod na sa isolation room sa usa ka tambalanan sa probinsiya sa Misamis Oriental ang usa ka overseas Filipino worker nga gika’g Hongkong, kinsa nakauli sa iyang pinuy-anan niadtong Domingo, Pebrero 2, sa lungsod sa Naawan, Misamis Oriental.

Matud pa ni Naawan municipal Mayor Dennis Roa, nakaabot sa iyaha ang impormasyon kabahin sa pag-uli sa OFW gikan sa usa ka concerned citizen nga kaila ra usab sa nasangpit nga OFW.


Unang nahidangat ang impormasyon nga aduna kini sakit apan gitin-aw sa Municial Health Office sa Naawan ug sa pamilya niini nga himsog ug walay gibating sakit ang 29 anyos nga OFW.

Gitin-aw ni Roa nga gibutang kini sa isolation isip pagsanong sa direktiba sa DILG ngadto sa mga local government units nga motabang sa pag-ila ug pag-isolate sa mga gikan og laing nasud nga nakauli sa ilang matag dapit.

Gipailawom na kini sa DOH-10 sa swab i-test niadtong Martes, Pebrero 4, ug gilauman nga mogawas ang resulta ugma, Biyernes, Pebrero 7.

Kung negatibo sa corona virus ang resulta, ipailawon kini sa ikaduhang swab test nga ang resulta mogawas sulod lang sa 48 oras.

Papa-ulion kini dayun kung negatibo ang resulta. (Divina M. Suson, February 6)

Facebook Comments