Aurora, Zamboanga del Sur- Gi-atiman na karun sa kapulisan sa lungsod sa Aurora ang 32 anyos nga babaye nga Overseas Filipino Worker (OFW) human nakaplagan daplin sa kalsada sa Poblacion, Aurora, Zamboanga del Sur nga magul-anon kay wala na masayod sa iyang padulngan.
Gusto ni Elsa Belalo Salde nga makauli sa iyang pinuy-anan sa Imelda, Zamboanga Sibugay apan nalibog siya kun hain kini agi-on ug asa nga rota sa bus ang sakyan.
Daling nakigkutay ni RadyoMan Miller Poliran sa kapulisan sa Aurora arun matabangan si Elsa.
Sa interview sa RMN Pagadian kang Elsa, usa ka tuig og tulo ka bulan siya nga nanimpalad sa Riyadh Saudi Arabia apan gipapa-uli sa iyang amo gumikan sa iyang gihambin nga balati-an.
Nitugpa ang eroplano nga iyang gisakyan sa Cagayan de Oro, rason nibyahe siya sakay sa bus paingon sa Zamboanga del Sur apan gumikan matud pa sa kabalaka nakahukom siya nga munaog sa lungsod sa Aurora.
Sa tabang usab sa PNP Aurora lauman nga maka-uli na sa iyang pamilya si Elsa ugmang adlawa human nakontak ang iyang igsoon.
Tags; RMN News Team
