Jamindan, Capiz – Panawagan subong pamilya Guillermo kag Vigo sa banwa sang Jamindan nga makapauli ang ila himata nga OFW nga nagatrabaho sa Riyadh, Saudi Arabia.
Base sa FB post ni Eden Guillermo Vigo, utod sang OFW nga si Maricel Guillermo Vigo nga naga-apelar ini sang bulig sa mga otoridad agud nga makapauli sa Pilipinas bangud sa kabudlay sa sitwasyon sang iya trabaho bilang domestic helper.
Halos wala ini sang pahuway sa trabaho. Nahibaluan dugang nga nahulog pa ini sa mataas nga hagdan matapos nga gulpi nagdulom ang panulokan kag pagpalangurog sang iya lawas sang nakaligad nga Agosto 16, 2021.
Makaligad nga ginpacheck-up kag ginpanugyanan sang doktor nga magpahuway, ini sa gihapon ang pilit nga ginpatrabaho sang iya amo sa pihak nga nagabatyag sang pagpalanakit sang lawas ang nasambit nga OFW.
Ang amo nga kaso ang ginpahibalo naman ni Maricel Guillermo Vigo sa iya agency apang wala sang aksyon ang mga ini.
Nagalaum ang iya nga pamilya nga mapauli sa labing madali nga panahon ang nahinambitan nga domestic helper.
