Report ni: Jennifer Palomo Debaja
Ginbawian gid sang kabuhi ang isa ka OFW nga tatlo palang ka bulan sa Hong Kong matapos nalumos samtang nagapaligo sa Butterfly Beach sa Tuen Mun sang Hulyo 1, 2019.
Ginkilala ang biktima kay Jen Lacson, 25 anyos, dalaga kag tumandok sang Cotabato City.
Sa inisyal nga imbistigasyon sang HK police, wala sang nakita nga may foulplay sa pagkamatay sang biktima apang igapaidalom ini sa autopsy para madetermine ang cause of death sang biktima.
Sa pahayag sang natabuan sa lugar, ala una sang hapon ginpa clear ang area sa mga swimmers matapos ginbroadcast sang lifeguard nga may kaso sang pagkalumos.
Nakit-an sang kapulisan ang bag sang biktima kag ginpanawagan pa ang ngalan sini apang wala sang response rason nga gin umpisahan ang search and rescue operation.
Sa pahayag naman sang boardmate sini nga taga Guipis, Anilao, nagdul-ong pa ang biktima sang Domingo sa airport sa utod nga nagbakasyon sa Pilipinas. Bilog nga adlaw man ang pagkontak sini sa request man sang utod apang wala gid nakasabat sang iya tawag.
Nagpadala pa kag naggamit sang helicopter ang rescue team sang Government Flying Service apang nag untat ini sang magdulom na ang palibot.
Takna alas 8:00 sang gab-i kag narekuber ang bangkay sang biktima malapit sa shark prevention net kag dali dali pa nga gindala sa Tuen Mun Hospital apang ginpronounce ini nga nag expire.
Gin identify naman sang Tiya sa ospital ang bangkay sang biktima.
