Report ni: Jennifer Palomo Debaja
Ginkumpirmar sang Department of Labor and Employment (DOLE) nga isa naman ka Filipina domestic helper sa Kuwait ang napatay matapos ginkastigo sang amo.
Ginkilala ang biktima kay Constancia Lago Dayag, 47-anyos kag tumandok sang Agadanan, Isabela.
Sa initial nga report nga nabaton ni DOLE Secretary Silvestre Bellow III, gindala ang Pinay sa Al Sabah Hospital Martes sang gab-i, Mayo 14, 209 apang gindeklarar ini nga dead on arrival sang doktor.
Suno pa kay Bello, nakaangkon sang madamo nga lagub kag kapilasan ang biktima kag narekuber pa sa sulod sang pagkababaye sini ang pipino. Indikasyon nga may posibilidad gin himuslan kag ginkastigo ang biktima antis ini napatay.
Bangud sa panibag-o nga kaso sang pag pangmaltrato, gindugang pa ni Bello nga dapat gid aksyunan kag pasabton sang gobyerno sang Kuwait ang naghimo sang krimen.
Ginpakamalaut man sang DOLE chief ang pagpatay kay Dayag kag ginmandu sini sa Philippine Overseas Employment Administration kag Philippine Overseas Labor Office sa Kuwait ang pagpasabat sa foreign kag lokal agency nga nagdeploy kay Dayag.
Kadungan sa pagbuylog sa kalisud sang pamilya, nangako man si Bello nga himuon sang gobyerno ang masarangan agud mahatagan sang hustisya ang biktima.
Ginpahayag man sini nga ginatun-an na ang posibilidad sang deployment ban sa nasambit nga pungsod.
Sa madumduman, gin order man sang nagligad nga tuig ang deployment ban sang Filipino workers sa Kuwait matapos nasapwan ang bangkay ni Jhoanna Demafiles sa sulod sang freezer sa abandonado nga apartment sa amo man nga pungsod.
