Report ni: Jennifer Palomo Debaja
Patay ang isa ka OFW sa Morocco matapos naglumpat halin sa ika-tatlo nga panalgan sa tuyo nga pagpalagyo sa amo.
Sa pahayag ni Charge d’ Affaires sa Tripoli, Elmer Cato, nakaangkon sang malubha nga kasamaran ang Pinay tuga sang pagkahulog sini sa building sa Casablanca matapos may nagluntad nga pagbaisay sa tunga sini kag sang iya Moroccan employer.
Nahibaluan nga nagtuyo nga magpalagyo ang 49 anyos nga OFW gamit ang ginsugpon nga mga panapton apang dimalas nga nabugto kag nahulog ini halin sa ikatlo nga panalgan sang building.
Yara naman sa kustodiya sang Morrocan police ang employer sini para imbistigaran.
Ginpadala naman sang konsulado sa Tripoli sanday officer Arcel Donato kag Lacson Casim sa Cassablanca agud mag coordinate sa local authorities kag para man sa repatriation sang bangkay sang biktima.
Suno pa kay Cato, biktima sang human trafficking ang Pinay bangud ginrecruit ini sa Pilipinas para mag obra sa Dubai apang gindeploy ini sa Morocco nga wala sang proper nga papeles.
“@PhinLibya has conveyed its condolences to the loved ones of our 49-year-old kababayan from Isabela who fell to her death in Casablanca. A human trafficking victim, she was recruited in the Philippines for a job in Dubai but ended up in Morocco instead. @teddyboylocsin @DFAPHL” pahayag ni Cato sa iya Twitter post sang Hunyo 25, 2019.
Sa hingyu sang pamilya, wala gin hingalanan ang biktima nga tumandok sang Isabela apang ginbilin sini sa kalisud ang iya bana kag duwa ka kabataan.
