iFM Laoag – Inpasingked ni Gobernador Matthew Marcos Manotoc iti panangipaay ti gobierno provincial a maipangpangruna a mabakunaan ti Anti-COVID-19 Vaccines dagiti OFW ken SeaFarer nga agsubli iti naggapuanda a nasion.
Inlawlawag ni Manotoc a nu kasapulan dagiti OFW ken Seafarer ti kompleto a bakuna kas requirement iti panagsublida iti pagtrabahuanda ket nakasagana ti gobierno provincial a mangipaay kadakuada.
Masapol laeng ti panagpakaammoda iti kapitolio wenu iti Provincial Health Office tapnu maipakaammo kadakuada ti rumbeng nga inda aramiden – kas iti dokumento ti employer ken dadduma pay.
Kalikaguman ti gobernador a maikkanda ti naan-anay a pannaka-asikaso tapnu saanda a maibaybayag iti panagsublida.
Inlawlawag met ni Dr. Rogelio Balbag, Provincial Public Health Officer a saan ngamin nga inraman ti DOH dagiti OFWs ken Seafarers a mairaman iti priority lists isu’t gapuna a ti gobierno provincial ti mangasikaso kadakuada. # Bernard Ver, RMN News
