Davao City – Gikalipay sa taga transport sector partikular na ang Southeastern Mindanao Diversified Driver Operators Cooperative (SEMDOCC) ang rollback sa presyo sa mga produktong petrolyo karong adlawa, July 23, 2019.
Sa interbyu sa DXDC RMN Davao kang Maning Duran, SEMDOCC President gisaysay niini nga makatabang kini og dako sa mga drivers ug operators ug mamahimong dako ang mauli nga income ngadto sa ilang mga pamilya ug mga mahal sa kinabuhi.
“Maayo gyud nang rollback kay para makabenipisyo ang atong mga driver. Madungagan ang ilang take home,” saysay ni Duran.
Nasayran nga epektibo karong adlawa, adlawng Martes ang ipatumang rollback sa presyo sa mga produktong petrolyo. Kini human sa gipatumang price increase sa nahisgutang mga produkto sa milabay nga mga semana. Sa anunsyo sa pipila ka mga kumpanya sa lana, adunay i-ubos nga P0.25 sa matag litro sa gasolina ug P0.20 usab sa matag litro sa diesel. Aduna usay P0.40 ang ikunhod sa matag litro sa kerosene.
RadyoMaN Kirby Manzon
