Tapaz, Capiz- Patay ang isa ka mister matapos nga ginluthang samtang ini ang yara sa sulod sang iya poluy-an sa Sitio Balighot Brgy. Camboranan, Tapaz alas 8 sang gab-e.
Patal nga pilas sa iya lawas ang naangkon sang biktima nga ginkilala kay Randy Galagate y Gardose, 35-anyos sang nasambitan nga lugar.
Base sa imbestigasyon sang mga kapulisan, tuyo na nga magtulog ang biktima kaupod ang asawa sini sang gulpi lamang nga luthang apang wala ini maigo.
Natukiban sang mga ini nga ginpalusot sa giha sang ila poluy-an ang armasluthang.
Nagguha ini kag gintsekyar ang palibot apang nadiskubrehan nga madasig nga nagpalagyo ang suspek rason nga nagbalik naman ang biktima sa sulod sang ila poluy-an.
Makaligad ang pila ka ginutlo, wala matalupangdan sang biktima nga nagbalik ang suspek nga si Rodrigo Lozada, 54-anyos sang Brgy. San Vicente, Jamindan kag diri siya ang niluthang rason sang gilayon sini nga kamatayon.
Nahibaluan dugang sa imbestigasyon sang mga kapulisan nga ang daan nga tema-tema ukon indi paghangpanay sa tunga sang suspek kag biktima ang rason sang krimen.
Matapos nga magpalagyo, boluntaryo sini nga ginsumiter ang kaugalingon sa mga kapulisan sang Jamindan PNP. Wala naman marekober sang mga otoridad ang armasluthang nga gingamit sa krimen.
