Davao City – Nagprepara og programa ang Coast Guard District Southeastern Mindanao (CGDSEM) sa pag-abot ni 2020 Tokyo Olympic silver medalist Coast Guard Petty Officer Third Class (PO3) Nesthy Petecio sa dakbayan sa Davao karong adlawa Lunes (Agosto 30, 2021).
Sa eksklusibong interbyu sa DXDC RMN Davao kang Ensign Vasit Venturillo, OIC, District Staff for Civil Relation Services, gitakdang mag-courtesy call si Petecio kang District Commander Commodore Allan Corpuz sulod sa Coast Guard Headquarters sa Sasa ning syudad.
Atol sa seremonyas hisgutan ang nahimong kaagi sa boxing sensation isip usa ka Olympian ug ang pagsulod niini sa PCG.
“Garbo sa Philippine Coast Guard nga nisulod ang usa ka Olympian sa atoa kay kini nagpakita sa pagsalig niya sa organisasyon nga kita gahatag og maayong serbisyo sa katawhan, dako siya’g impact nga mudugang sa pagsalig sa katawhan sa pagmentenar sa seguridad sa atong kadagatan ug paghatag og klase klaseng serbisyo para sa tanan,” segun niini.
Si Petecio uban ni weightlifter Elreen Ando nag-took oath niadtong Agosto 19 sa PCG National Headquarters, Port Area, Manila sa pagpangulo ni Department of Transportation (DOTr) Secretary Arthur Tugade.
In honor sa iyahang pagkadaog isip silver medalist sa women’s featherweight (54-57kg) division sa Tokyo Olympics gipromotar si Petecio sa PCG sa ranggo nga Petty Officer Third Class (PO3).
Human sa aktibidad niini sa Coast Guard, mag-courtesy call usab si Petecio sa nagkadaiyang mga LGUs.
RadyoMaN Aimee Guinita
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
