On-duty nga security guard gipusil patay

16

[image: IFM 919 Logo (1).jpg]
Patay sa pagpamusil ang 33 anyos nga security guard sa usa ka parmasya sa Aparente Street, Barangay City Heights ning siyudad sa Gensan pasado alas-11 sa gabie Dominggo (November 25, 2018) human gipusil sa wala pa mailhan na gunman.

Giila sa inisyal nga imbestigasyon sa Police Station 4 San Isidro ang biktima sa pangalang Jonifer Mercado, residente sa PBMA Compound, Purok Bagong Silang, Barangay Baluan ubos sa Seabren Security Agency.

Takda na mag-duty sa iyang trabaho ang biktima dihang kini gipusil sa gunman duha ka beses igo sa iyang ulo hinungdan sa iyang kamatayon.

Gisulayan pa ang biktima nga i-revive sa nagrespondeng emergency medical service sa Rescue 727 apan tungod kay fatal gunshot wound sa ulo ang naangkon kini ang hinungdan sa pagkamatay ni Mercado.

Sa pagproseso sa PNP – Scene of the Crime Operatives narekober nilang Police Chief Inspector Remegio Mangoangang ang duha ka fired cartridge sa .45 caliber pistol duol sa patayng lawas sa biktima.

Intact o wala usab matandog ang personal nga gamit sa biktima ug ang iyang motorsiklo nga naka-center stand gawas sa parmasya ingon man ang issued firearm niini nga .38 caliber revolver.

Niabot sad pipila ka oras ang kaparyentehan sa biktima ngadto sa crime scene og subo ang ilang pamalandungon sa nadangatan nga kamatayon sa security guard.

Gidala sa pribadong punerarya ang patayng lawas sa nasangpit aron mapahiluna og tarong sa iyang pamilya.

Padayon ang gihimong imbestigasyon sa kapolisan kabahin sa motibo sa krimen.

Facebook Comments