Davao City – Sa Daang Tugon sa bibliya, ang managti-ayon nga daghan og anak gitratar nga mas gipanalanginan sa Diyos ug tinunglo sa Kahitas-an ang mag-asawa nga usa or duha ra’y anak.
Giila nga gasa gikan sa Diyos alang sa magti-ayon ang pagbaton og mga anak diin mao kini ang mukumpleto aron matukod ang kaugalingon nga pamilya.
Giangkon ni Marlyn Agonia sa City Social Services and Development Office nga bisan sila nagtinguha nga sa matag pamilya, dili lang kay usa ang anak kon dili, mas maayong muabot hangtud sa tulo.
Segun ni Agonia, mas bentaha gayod sa magti-ayon kung daghan og anak kay diha sa bulotahon sa balay, ang nanay dunay kaabag sa paghikutar sa mga gimbuhaton sulod sa ilang panimalay.
Usa pa niana, bentaha pod kaayo sa bahin sa mga ginikanan ini’g katigulang nila tungod kay daghan sila og kaadtoan ug kapuy-an ug daghan usab ang maka-asistir sa paggasto sa ospital pag-abot sa panahon.
Ang importante alang kang Agonia mao nga mapakaon, mabistihan og tarong ug mapatungha ang mga kabataan bisan pa og daghan sila.
Dugang ni Agonia, mag-unsa matud nang daghan og anak apan dili man sab makakaya og buhi ug dili mahatag ang maayong kaugmaon diin mahulog nga makaluluoy ang mga bata.
Gipamahayag ni Agonia nga adunay dakung bahin sa haruhay nga kinabuhi ang pagbaton og ubay-ubay nga anak hilabi na kung nahulma og maayo ang ilang maayong pamatasan ug kaugmaon.
Apan ang problema lang kung daghan og anak ang mga ginikanan, wala na’y panahon sa pagdisiplina ug pagtudlo og maayong mga butang kanila hatud sa sobra ka-busy na sa trabaho.
Ang epekto sa kawalay personal nga pagpanudlo sa mga ginikanan ngadto sa ilang mga anak mao nga mahimong bato sa kagahi sa mga ulo, maldito ug dali ra magalgalan sa paghimo og krimen sa katilingban.
Nahibaluan nga binilyon ka pesos ang ginagahin nga pundo sa nasudnong kagamhanan aron matigayon ang mga programa nga nagpunting sa pagtabang sa nagkalisud nga mga ginikanan.
Gilauman nga mas musamot pa ang pagtaas sa krimen ug sa mga kriminal sa nasud kung dili pangitaan og tubag sa kagamhanan ang 2M nga usbaw sa populasyon kada tuig.
Maong uyon si Agonia nga ipatuman sa nasud ang ‘one child policy’ sa matag pamilya aron matutukan og maayo ang pag-amoma ug dili mapasagdan sa mga ginikanan ang ilang mga anak samtang sila magdaku.
RadyoMaN Joel Viray
