Roxas City, Capiz- Liwat nga gin-imbitahan ni CapENRO head Atty. Emelyn Arboleda-Depon ang publiko nga buylogan ang “One in One Project” sa maabot nga adlaw sang Lunes, Hunyo 25, 2018 nga una na nga gindeklarar ni Capiz Gov. Tony del Rosario bilang Provincial Arbor Day.
Pinakakatuyoan sang amo nga hilikuton nga makatanom sa bilog nga probinsya sang isa ka milyon nga mga nagkatuhay nga sahe sang puno sang kahoy.
Suno kay Depon, base sa pinaulihi kag partial nga datos naglab-ot na sa 58, 444 ka mga participants ang nag-signify sang intensiyon nga sila ang magapakig-upod sa amo nga aktibidad nga target iduso ang “Go Green Capiz’.
Pahayag sini dugang nga padayon pa ang withdrawal sang mga seedlings sa ESLA sa Brgy. Lanot subong man sa Capiz Eco Park sa Nagba, Cuartero Capiz.
Samtang agud nga ma-dokumento ginpanugyanan ni Depon ang mga netizens nga gamiton sa pag-upload ukon pag-post sa social media ang hashtag nga #OneinOneProject; #OneMillionTreesinOneDay; #GoGreenCapiz.
Ang “One in One Project”: One Million Trees in One Day, ang isa ka proyekto sang provincial government sa pagpanguna sang Capiz Provincial Environment and Natural Resources Office(CapENRO) kapartner ang nagkatuhay nga ahensiya sang gobyerno, mga local government units(LGUs), non-governmental organizations(NGOs), pribado nga sektor, mga eskwelahan, Kapisanan ng mga Brodkaster ng Pilipinas(KBP), pribado nga sektor kag iban pa.
