Roxas City, Capiz- Target sang pamunoan sang Capiz Provincial Environment and Natural Resources Office ukon CAPENRO nga makatanom sang isa ka milyon nga kahoy sa Capiz sa sulod lamang sang isa ka adlaw.
Suno kay CAPENRO head Atty. Emelyn Arboleda-Depon, gindeklarar sang pamunoan sang probinsya sang Capiz ang “Provincial Arbor Day” kun sa diin dululongan nga igatanom sang tanan nga mga stakeholders ang isa ka milyon ka mga nagkatuhay nga sahe sang puno sang kahoy sa maabot nga Hunyo 25, adlaw sang Lunes.
Samtang ginpasalamatan man sini ang Provincial Environmental Management Committee kag iban pa nga mga Local Government Units(LGU), ahensya sang gobyerno kag mga pribado nga sektor nga nagkomiter nga magapasakop sa amo nga kahiwatan sa diin ginaduso ang reforestation kag maproteheran ang palibot.
Nahibaluan nga sa ginpatigayon nga Provincial Environmental Management Committee meeting sang nakaligad nga Mayo 28, kalakip sa mga nagpromisa amo ang lokal nga pangulohan sang banwa sang Sapian, Cuartero, Ivisan, Pilar, President Roxas kag Jamindan.
Nagalab-ot sa 50, 000 ka mga mangrove propagules ang ginpromisa sang BFAR; 100, 000 ka mga seedlings ang magahalin sa tanan nga campus sang Capiz State UniversityCAPSU); 45, 000 ka mga seedlings sang lubi ang iya sang PCA-Capiz kag kabug-osan nga 500, 000 ka mga seedlings ang ginpromisa sang DENR-Capiz.
Nagalaum naman si Atty. Arboleda-Depon nga labi pa nga madugangan ang magakomiter sang intensyon nga makatanom sang isa ka milyon nga puno sang kahoy sa Hunyo 25.
*tags:Visayas,Roxas,DYVR,DYVR657,Capiz,CAPENRO,Atty. Emelyn Arboleda-Depon*
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
