One-legged triathlete nga si Rudy Fernandez, nagbike palibot sa Lapaz plaza sa sulod sang 24 oras

121

ILOILO CITY – Nangin madinalag-on ang one-legged triathlete nga si Rodoflo “Rudy” Fernandez sa pagtapos sang iya world record attempt nga magbisekleta sa palibot sang Lapaz plaza sa sulod sang 24 oras nga wala sang untat.

Nainitan kag naulanan ang ginakabig “Iron Man of Asia” apang wala ini makasablag para makuha ang bag-o naman nga record.

Aminado ini nga dako nga pagpanghangkat ang malain nga tiempo sa pagbisekleta palibot sa plaza ilabi pa nga nag-ulan Disyembre 6 sang kaagahon gani madanlog ang dalan kag matugnaw para sa iya bangod basa ang iya bayo.

Nangin emosyonal si Rudy nga nagpasalamat sa mga nagsuporta sa iya sa paglab-ot sang isa naman ka handum.

Antes sini, ginhandaan na ni Rudy ang wala untat nga pagbike sa sulod sang 24 oras paagi sa pagbike adlaw-adlaw sa indi magnubo sa apat ka oras.

Kada Dominggo, naga-long ride man ini kag nagalab-ot pa siya sa pagbike sa Aklan kag Antique.

Suno kay Rudy, luyag sini nga ipakita sa tanan nga isa ka healthy environment ang syudad sang Iloilo nga ginakabig man nga isa ka bikeable city sa pungsod.

Gusto man sini nga ipakita nga apisar sang iya edad kag kasablagan sa lawas, masarangan sini sa gihapon nga mahimo ang aktibidad bangud may yara siya sang determinasyon.

Ang tu-o nga tiil ni Rudy na-utod bangod man sa isa ka insidente sang pagpangbomba sa isa ka sinehan sa syudad sang Iloilo sadtong July 1978.
Kon madumduman, ginlangoy man sadto ni Rudy ang Iloilo-Guimaras Strait.

Lakip pa diri ang paglangoy niya sang Guimaras – Bacolod Strait nga may distansiya nga 24 kilometers sa sulod sang walo ka oras, nagdalagan sang 104 kilometers gikan sa banwa sang Sara padulong sa Iloilo City sa sulod sang tatlo ka adlaw kag dugang pa diri ang mga ginpasakupan nga internation competition.

Nag-bike man ini sang 240 kilometers gikan sa syudad sang Iloilo pakadto sa Roxas City sa sulod sang 13 oras kag madamo pa nga iban.

Ginhalad ni Rudy ang iya bag-o nga kadalag-an sa mga Ilonggo.

Si Rudy, isa ka retired nga manunudlo, nagapanuigon sang 70 anyos, former PBB Housemate kag one-legged traithlete.

Ginpasidunggan man sadto bilang readers digest heroes of Today.

Facebook Comments