Ginposasan, gintaya-an sang armas, ginsipa, ginsiko kag ginkastigo sang todo ni first district congressman Richard Garin si PO3 Federico Macaya Jr., 41 anyos sang Zone 4 Sambag Jaro kag assigned sa Guimbal Municipal Police Station.
Ang kaakig ni Garin nag-ugat sa nagluntad nga ginamo sang Disyembre 22 kadungan sa “Disyembre sa Guimbal” nga kahiwatan.
Ginpahayag nga nagpa areglo ang pulis rason nga wala napasaka ang kaso batok sa anak sang isa ka SB Member.
Kaina sang kaagahon, Disyembre 26, takna alas 3:20 sa kaagahon, nagahiwat sang patrol monitoring si Macaya sakay sa ila police patrol sang gintawagan siya sang ila hepe nga si PSI Antonio Monreal jr. nga magbalik sa ila police station.
Pag-abot sa police station, ginhambalan siya sang hepe nga mag-upod sa iya pakadto sa plaza sang Guimbal.
Sang nagapadulong na sila sa wala nga bahin sang Municipal Building sang banwa, ginhambalan siya ni Congressman Garin nga magpabilin sa area malapit sa CR sang mga lalaki kag ginmanduan ang hepe nga dis-armahan si Macaya.
Ginkumpiskar man ni Garin ang cellphone ni Macaya, ball pen kag ginposasan ini.
Ginpapungko ni Garin si Macaya samtang nakaposas ang pulis kag sige pamangkot sa iya tuhoy sa natabu nga kinagamu nga naga-imbolbar sa anak sang isa ka SB member.
Samtang ginasapote sang congressman ang police, ara man ang presensya ni Guimbal Mayor Oscar “Oca” Garin nga nagataya sang caliber .45 kay Macaya.
Sa karun ginatinguhaan pa sang RMN Iloilo nga malab-ot ang bahin sang mga Garin. Base sa impormasyon, magapatigayon sila sang media press conference angot sa natabo.
Photo via Richard Garin FB
