Davao City – Gumikan sa community quarantine protocols bunga sa 2019 coronavirus disease kon COVID-19, mipatok karon ang online business sanglit daghan sa mga Pilipino hadlok muadto og merkado,busa gipaagi na lamang nila sa online ang pagpalit sa ilang panginahanglanon sa panimalay sama sa sud-an ug groceries.
Aminado si Davao Second District Councilor Danilo Dayanghirang nga lisod punggan karon ang mga indibidwal nga manginabuhi via online commerce gumikan sa kalisod nga nasinati karon diin daku usab kini’g tabang alang sa mga dili na buot mugawas ug mamalengke sa merkado aron makalikay sa COVID-19.
Sumala ni Dayanghirang, ang kakulang sa balaud kon ordinansa maoy rason nganong ang gobyerno maglisod og regulate ug monitor sa online business sanglit ang transaksiyon mahitabo gipaagi sa internet or bin ba kaha sa text messages lamang.
Kung padayon nga mokuyanap ang online business, dakung buhis ang mawala sa panudlan sa gobyerno ug ang masakripisyo mao ang serbisyo publiko ug pagtabang kon pag-ayuda ngadto sa mga Pilipino kinsa naglaum nga matabangan sa kagamhanan.
Gikonsidera karon sa lokal nga magbabalaud sa pagduso og ordinansa nga mag-regulate sa mga online businesses ug mag-obliga kanila sa pagparehistro ngadto sa BIR alang sa makolektang nasudnong buhis ug business permit alang sa lokal nga buhis.
Samtang gikunsidera sa maong konsehal ang pagduso og ordinansa diin gidasig niini ang mga nahilambigit sa negosyo sa online nga magparehistro ug magkuha gayud og business permit sa lokal nga kagamhanan aron legal na ang ilang negosyo online.
RadyoMaN Joel Viray
