Nasikop kagahapon sa operatiba sa City Drug Enforcement Unit kon CDEU ang usa ka Online Graphic Designer. Kini human nga gilusad sa maong ahensya ang anti-illegal drug buy bust operation diha sa Cogon Area, Pinikitan, Brgy. Camaman-an ning syudad sa Cagayan de Oro.
Naila ang dinakpan sa mga otoridad nga 30 anyos nga si Kyrnykw Zeus Faelden alyas Zeus Faeldon, ulitawo nga taga Damilag, Manolo Fortich sa Bukidnon.
Matud pa sa otoridad nga naa sa watchlist ang maong dinakpan isip pusher ug napalitan kini sa pulis nga nagpaka-aron ingnong buyer sa usa ka sachet sa gituhoang shabu balor 500 pesos nga maong hinungdan sa pagka-aresto ni-ini.
Atol sa pagrekisa sa maong suspek nakuha gikan sa posisyon ni-ini ang 500 peso bill nga ginamit isip buy-bust money. Laing mga salapi nga balor 290 pesos sa nagkalain-lain denominations.
Namatikdan nga mitulo pa ang mga luha sa suspek sa pagkadakop ni-ini tungod gibutyag ni-ini nga naa pa sulod sa hospital duol sa maong lugar ang iyang anak nga dunay sakit nga dengue. Apan wala kini nahimo kon dili ang dakong pagmahay ni-ini kung nganong nagpatintal kini sa iyang kanhi kauban sa trabaho nga mosulod sa iligal nga binuhatan.
Gibana-banang motimbang sa 0.08 grams ang nakumpiskang shabu sa dinakpang nga dunay street value 500 pesos.
Gidala gilayon kini sa mga operatiba ngadto sa Maharlika Detention Cell alang sa temporaryong pagkustodiya samtang giandam na ang tukmang kaso nga atubangon ni-ini ngadto sa korte.
Kasama mo sa CDEU, RadyoMaN Andy Coco, DXCC Tatak RMN!
