Davao City – Gidepensahan karon sa kanhi pangulo sa hut-ong sa mga negosyante sa syudad ang mga online sellers sa isyung bag-ong kobransa sa buluhisan niadtong nag-income og P250,000 kapin matag tuig.
Sumala ni kanhi Davao City Chamber of Commerce and Industry, Inc. (DCCCII) President Antonio Dela Cruz, dili siya uyon sa laraw sa gobyerno nga kuhaan og buhis ang mga online sellers labaw na niadtong maigo sa income threshold.
Rason ni Dela Cruz, dili pa kini mao ang ensaktong panahon aron kobrahan og buhis ang mga online sellers sanglit ginagmay ra man kini nga matang sa pamatigayon gani pantawid kun panglatas ra kini sa krisis nga atong gisagubang mugna sa makamatay nga virus infection.
Segun ni Dela Cruz, unfair alang sa mga online sellers ang laraw sa government finance sector samtang walay timik ang estado diha sa paggukod sa mga dinagkong Philippine Offshore Gaming Operators kun POGO handlers kinsa gibana-banaang anaa sa vicinidad sa P50-P70B ang unpaid and unremitted taxes niini sa atong panudlanan.
Mas maayong pahumanon na lamang usa sa gobyerno kining distroso kaayong pandemic ug tan-awon ang posibilidad sa pagkobra og buhis sa mga online sellers didto sa unahan apan dili lamang usa karon hangtud nga makalabang na kita gikan sa baguod nato karon, dugang ni Dela Cruz.
RadyoMaN Joel Viray
