Davao City – Angay mahibal-an sa mga konsumante ang ilang katungod lakip ang responsbilidad diha sa pagpamalit sa mga produkto ilabi na diha sa online shopping.
Sa pakighinabi kang Department of Trade and Industry (DTI) XI Regional Director Belenda Q. Ambi atol sa tulumanong Serbisyong Straight to the Point uban si RadyoMaN Misel Miral-Galve, gibutyag niini nga ang tema sa Consumer Welfare Month (CWM) karong bulana ning tuig 2018 mao ang “Making Digital Market Places Fairer”.
Matud pa nga subay sa nasangpit nga tema, tutukan niini ang epekto sa digital technology ug unsa usab ang ikatabang niini sa pagsuta sa kalidad sa produkto.
Pahimangno ni Ambi subay usab sa awhag karon sa DTI ngadto sa mga konsumante nga kinahanglan magmaigmaton ug wais sa pagpili ug pagpalit og mga produkto sa online aron dili maliba.
Dugang ni Ambi, kinahanglan susihon pag maayo ang online site o online shopping page sa social media og legit ug registered ba kini aron og magkaproblema o adunay reklamo, aduna pay balikan.
Subay sa maong selebrasyon karong bulana, dunay mga nakalinyadang aktibidad ang DTI-XI sama sa Quiz B ug poster making alang sa mga bata diin tumong niini nga samtang bata mahibal-an na nila ang katungod sa mga konsumante.
Dugang pa sa pagahimuon mao ang consumer education series of seminars sa mga brgy., regional conference for business owners and consumers karong October 26, 2018.
RadyoMaN Renz Barbarona
