Davao City – Mi-alma karon ang usa ka kandidato sa pag-konsehal sa unang distrito ning siyudad sa dabaw nga si Ernesto Macasaet sa kawalay aksyon sa Commission on Election (COMELEC Davao) sa pagbaklas sa mga posters ug mga tarpaulin sa ubang mga kandidato nga nakasabit sa mga poste, ug sa mga punoan sa kahoy.
Mulo ni Macasaet mao nga kung nganong wala gipananggal sa COMELEC ang mga posters ug mga tarpaulin sa ubang mga kandidato nga tataw man unta kaayo kini nga kalapasan sa balaud sa piniliay kay mugawas nga unfair kini alang kaniya ug sa mga independent candidates nga walay ikasarang sa kampanya hilabi na nga wala sila’y gisaligan nga partido nga mutabang kanila sa eleksyon.
Gitubag kini ni COMELEC Davao City First District Assistant Election Officer Neneng Gestosani nga dili pa nila mabaklas sa karon ang nagbansiwag nga mga posters sa mga kandidato kay wala pa’y pormal nga kampanya sa local level busa wala sila’y kagahum sa paghimo sa ingon sanglit dili pa matawag nga bayolasyon ang gibuhat sa ubang kandidato nga gireklamo ni Macasaet.
Ang adunay kagahum nga mulampornas ug tanggal sa mga posters ug mga tarpaulin sa mga kandidato nga makita sa bisan asang dapit sa siyudad sa dabaw mao ang kapulisan,matud ni Gestosani.
Hinoon gihagit ni Gestosani ang mga aspirang candidates nga dunay mulo batok sa ubang kandidato nga mas maayong musang-at og reklamo aron mahatagan og aksyon sa ilang buhatan aron mupatigbabaw ang patas nga tratamiento sa tanang kandidato nga nagpapili sa taliabot nga eleksyon.
RadyoMaN Joel Viray
