Davao City – Wala pa gitino sa Commission on Election Davao City kung kanus-a sugdan ang ‘Operation Baklas’ aron tanggalon ang mga posters sa mga kandidato nga gisab-it sa miaging kampanya sa midterm election.
Gibutyag ni COMELEC Davao City 1st District Assistant Election Officer Neneng Gestosani nga wala pa sila’y gitakda nga panahon alang sa ‘Baklas’ aron mahipos na ang mga basura nga gibilin sa mga politiko palibot sa siyudad sa dabaw.
Giingon ni Gestosani nga nagpaabot pa sila og mando gikan sa ilang labaw alang sa pagsugod sa maong clean up drive aron mahipos na ang mga basura nga gibilin sa mga midaog ug sa mga naparot nga mga nagpapili sa nakalabay nga eleksyon.
Sanglit dili sila makalihok ug makaarangkada sa maong kampanya kung walay ipagula nga direktiba ang ilang election officer nga si Attorney Krishna Samantha Caballero kinsa una nang nagbutyag nga ang mga kandidato na ang dapat manglimpyo sa ilang mga campaign materials.
Wala man gi-obliga sa COMELEC ang mga kandidato nga hiposon ang ilang mga posters apan angay nila kini himoon karon nga hingpit nang nahuman ang eleksyon.
Masaligon si Gestosani nga matabangan sila sa City Environment and Natural Resources Office kun CENRO sa paglusad og ‘Operation Baklas’ aron mahinlo ang siyudad gikan sa mga campaign materials sa mga kandidato sa bag-ohay natapos nga eleksyon.
RadyoMaN Joel Viray
