Davao City- Wala na madala sa ospital ang usa ka operator ug nakabsan kini sa kinabuhi human naipit sa bulldozer nga iyang gidrayban pasado 11:00 sayo sa kaudtohon nga nahitabo sa may Purok San Miguel Barangay Indangan, Buhangin district ning syudad sa Dabaw.
Miabot og halos duha ka oras ang pagluwas sa mga personahe sa 911 sa operator gumikan sa pagkaipit niini og maayo sa lingkuranan sa bulldozer human mibalintong.
Busa migamit na og crane ang rescue team ug giguba ang pipila ka parte sa ekipo aron lang makasulod gamay ang mga resucers ayha pa nakuha ang biktima.
Nakahiagom og daghang bali sa kalawasan ang maong lalaki ug wala na matabang pa sa medic team nga mihiling sa biktima busa gideklara kini nga patay na.
Nasayran nga nagpahulay pa ang operator sa bakanteng luna sa Quiboloy compound sa maong lugar ug pipila ka oras nakalabay gisuwayan sa biktima nga mapasaka ang bulldozer sa truck.
Matud sa mga nakakita, walay hagdanan ang truck hinungdan naglisod og pasaka ang operator sa bulldozer ug pipila ka minuto nakalabay kalit na lang nabalintong ang ekipo ug maayong pagkaipit sa biktima.
Nakapangayo pa og tabang ang operator kinsa wala pa nailhan ang pangalan apan wala na kini kinabuhi sa dihang nakuha sa mga rescuers.
Sa karon gidala na sa punerarya ang patay’ng lawas sa biktima.
Kasamang Joel Viray
