Davao City – Wala gihapo’y nakita nga kausaban sa mga kandidato nga nagduso og certificate of candidacy sa buhatan sa Commission on Elections ang usa ka professor sa tulunghaan sa mga pastors.
Kung tan-awon sagad sa mga nagduso og COC sa COMELEC ang kasamtangan ug daan ra gihapon nga mga politiko kinsa magpapili pag-usab sa position nga buot nilang rendahan, sumala ni Brethren Evangelical School of Theology Professor Ariel Coleto.
Sulod sa kapin semana sa filing sa COC, namatikdan ni Coleto nga aduna’y bag-ong nawong sa pulitika apan kwestiyonable usab ang ilang kredibilidad ug pagkatawo busa dili gihapon sila kasaligan.
Gipalanog pa ni Coleto ang iyang paghisupak sa pipila ka probisyon sa balaud sa eleksyon nga nagpunting sa katungod ug kaulang sa standard sa mga kandidato.
Ang kapait pa gyod matud sa professor nga ang ubang nanagan klaro na kaayo may diperensya ug walay igong kapasidad apan tugotan gumikan lagi kay katungod man ang pag-apil sa eleksyon.
Segun ni Coleto nga angayan na nga rebyuhon ang pipila ka probisyon sa balaud ug i-adaptar ang mga talamdan nga mag-obliga sa mga aspiring candidates sa pagpailawom sa neuro-psychiatric examination.
Sanglit mangalagad man sila sa katawhan, angayan lamang usab nga segurohon nga ang makalingkod sa gahum may igong katakos ug hustong pangisip ug adunay kapasidad sa paghawid sa responsibilidad.
RadyoMaN Joel Viray
