Pagadian City – Arestado ang usa ka opisyal sa Moro National Liberation Front (MNLF) human gireklamo sa iyang silingan gumikan sa pagpabuto og armas dihang dapita sa Purok Pagaypay, Brgy. Kawit syudad sa Pagadian.
Giila ang naaresto nga suspek nga si Fernando Malayan, MNLF Major ilalom sa Task Force National Command og residente sa Brgy. San Jose ning dakbayan.
Matud sa complainant nga si Jeaniliza Enerio, naglalis ang suspek ug ang ka live partner pipila ka minutos ang nilabay nakabati sila og kusog nga buto sa armas.
Lango matud pa sa ilimnon nga makahubog ang suspek dihang nakiglalis sa iyang kaipon nga misangko sa paghormintado niini.
Nahadlok ang reklamante dihang misulod sa ilang gipuy-an ang usa ka bala rason nga mitawag sila og pulis.
Sa pagresponde sa kapulisan nakumpiska gikan sa suspek ang 9mm nga pistola lakip ang lima ka buhi nga bala ug Identification Card nga nagpamatuod nga miyembro sa MNLF.
Nakuha usab sa mga otoridad ang usa ka slug sa bala sa 9mm nga misulod sa balay ni Enerio.
Aminado usab ang suspek nga nakapabuto kini sa iyang armas gumikan sa problema ug wala pagsinabtanay sa iyang kaipon.
Sa pagkakarun gipaslak na sa Pagadian City Police Station lock-up cell samtang naghulat sa kasong ipasaka nga Alarm Scandal ug pagalapas sa RA 10591 kun illegal possession of firearms and ammunition.
