Davao City – Tungod sa gipahigayong Oplan Bulabog, usa ka Joint Anti-Criminality and Terrorism Operation Plan sa pipila ka mga barangay dinhi sa syudad sa Davao kagahapong adlawa, Nobyembre 8, tulo ka mga wanted persons ang naaresto sa kapulisan sa nagkalain-laing kaso.
Base sa report sa Davao City Police Office kun DCPO, giila ang mga naaresto nga sila si Renato Zamoras Cabariana Jr. nga nag atubang og Violation of Comelec Resolution No. 10015, Joel Ragmac Jamora tungod sa Less Serious Physical Injury ug Jenelyn Arevalo Quibol nga nag atubang og kasong ‘Simple Slander.’
Dugang niini, kapin 900 ka mga tawo ang gipailawom sa profiling sa pipila ka mga barangay dinhi sa syudad diin sa report sa DCPO, 974 katawo ang gipailawom sa identity check diin 809 niini ang dunay identification cards kun IDs, 165 ang walay napakitang IDs, 13 ang Internally Displaced Persons (IDPs) nga gikan sa Marawi City.
Ang maong operasyon gilusad sa DCPO kauban ang pwersa sa RPSB 11, PCG 11, RMU 11, RIU 11, NBI 11, CIDG 11, NICA 11 ug dunay special participation sa Deputy Provincial Directors for Operations of DNPPO, COMVAL, DOPPO, DSPPO ug DOCCPO ug ang ilang Operations Officers ug selective Chiefs of Police isip observers.
Gihimo ang Oplan Bulabog sa Purok 9, Lower Madapo, Brgy 8-A, Arroyo Compound, Matina Crossing, KM 12, Bolinao Site, Muslim Village, Ilang, Alegre, Manggahan, Toril, Deca Homes, Tacunan ning dakbayan.
RadyoMaN Renz Barbarona
