Davao City – Gipailawom ang 1500 ka mga tao sa profiling human gilusad ang ‘Oplan Bulabog’ kun Joint Anti-Criminality/Terrorist Clearing Operation kagahapong adlawa alas 5:00 sa buntag sa pagpanguna sa Davao City Police Office (DCPO) ug uban pang nagkadaiyang ahensiya sa gobyerno ning siyudad sa Davao.
Sa datos sa DCPO, anaa sa 1,400 ka tao ang adunay ID samtang 100 ka mga tao ang walay gipresenta nga valid ID ug daghan usab ang nadakpan nga dunay nagkalain-lain nga kaso.
Sa mga nagkadaiyang police stations sama sa Sta. Ana, San Pedro, Talomo, Buhangin, Sasa,Tugbok, Toril, Bunawan, Calinan ug Marilog gipahigayon ang maong operasyon.
Dungan usab gilusad kagahapon ang ‘Oplan Lambat Bitag Sasakyan’ diin kapin usa ka gatos ka mga sakyanan ang na-impound ang anaa sa DCPO ug gipang isyuhan og citation ticket sa mga otoridad ang mga driver human nakalapas sa balaud-trapiko.
Subay sa datos sa DCPO, mao kini ang unang operation sa ‘Oplan Bulabog’ ug ‘Oplan Lambat Bitag Sasakyan’ sa tuig 2018.
RadyoMaN Don Pulayao
