Davao City – Suportado sa Public Safety and Security Command Center (PSSCC) ang Davao City Police Office (DCPO) sa paglusad sa ‘Oplan Clean Rider’ kun pagpamaskil og stickers sa ma-check nga mga motorsiklo.
Pabor si PSSCC Operations Head retired Police Superintendent Angel Sumagaysay sa bag-ong pamaagi sa DCPO sa pagsumpo sa kriminalidad dinhi sa dakbayan sa Dabaw.
Gibutyag ni Sumagaysay nga mas maayong mabutangan og sticker ang mga motor aron ang mga pulis makaila dayon sa mga nakasakay kun kriminal ba o dili.
Namatikdan nga sagad gamit sa mga ‘riding-in-tandem’ suspects sa ilang krimen mao ang motor sanglit mas paspas ug dali ra sila makalusot sa mga pi-ot nga lugar bisan og trapik pa kaayo kini.
Dugang sa kanhi opisyal sa kapulisan nga mas dali ra unya mamatikdan sa mga awtoridad kun dunay magdagan nga motor sa kadalanan nga walay plaka.
Pinaagi niini, mapugngan gilayon ang mga krimen nga buhaton sa mga dautang elemento dinhi sa atong dakbayan sa Dabaw.
Gidepensahan ni Sumagaysay ang DCPO sa wala paglakip sa pribadong mga sakyanan sa pagbutang og sticker sanglit sulagma lang mugamit og four wheels ang mga suspek sa ilang buhaton nga krimen.
RadyoMaN Joel Viray
