Davao City – Gipanganti karon sa Philippine Drug Enforcement Agency (PDEA-XI) nga kanunayon nila ang pagkasa og mga surprise drug tests sa tanang mga drayber sa mga de pasaheroang sakyanan dili lamang matag adunay okasyon.
Sa interview sa programang ‘Straight to the Point,’ gisugilon ni PDEA-XI Assistant Regional Director Atty. Behn Joseph Tesiorna nga wala silay gipiling mga subjects sa ilang pagkasa og drug tests sama sa nationwide ‘Oplan Harabas: Drug Test Muna Bago Biyahe’ niadtong Marso 29.
Katuyuan niining kampanya mao ang pagpailawon sa mga tsuper sa Mandatory Drug Tests aron masiguradong luwas nga mahatud ang mga pasahero ngadto sa ilahang mga destinasyon sanglit dili lango sa droga ang gamaneho niini.
Kahinumduman nga niadtong Marso 29 nga drug tests, sa 300 ka mga taxi drivers sa Davao International Airport, tulo ang nagpositibo sa iligal nga droga atol sa pagsumite nila sa ilahang mga urine samples.
Ubos sa RA 10586 kun Anti-Drunk and Drugged Driving Act, mamahimong silotan ang drayber nga modumili sa pagpailawom sa iyang kaugalingon sa quick random drug test ug mamahimong bakwion usab ang driver’s license niini.
RadyoMaN Aimee Guinita
