Ya sale espantao el maga tsuper de PUJ y de van cuando derepente ya abuya na differentes storage areas el maga agente del PDEA junto conel LTO y LTFRB y ya pone bajo canila na “on the spot drug test”.
Este el program del PDEA ta llama “Oplan Harabas”.
Este el primer programa del PDEA donde egual el operacion ya conduci enantes na entero paiz.
Asegun con el portavoz del PDEA 9 si Darmalyn Jumlail, despues lang del cuantos minuto ta sabe dayunel resulta si porque 23 aqui na Zamboanga City y uno na Pagadian City el inicialmente ya sale positivo.
Aquelios maga positivo ay tene que confisca el diila licencia y ay recomenda para cancela coneste el LTO.
El objeto del programa amo para asegura salvao el maga pasajero ta munta na maga PUJ y na maga van de pasajero.
