Davao City – Gikatakdang iimplementar sa City Traffic and Transport Management Office (CTTMO) ang OPLAN Kaluluwa rerouting scheme ugmang adlawas Nobyembre 1 ug 2 sa mga nag-unang sementeryo dinhi sa syudad sa Davao.
Alang sa re-routing scheme sa Davao Memorial Park, mamahimong gamiton sa mga behikulo gikan downtown paingon sa Davao Memorial Park ang McArthur Highway sa peak hours (sugod alas 3 sa hapon) diin gidid-an ang pag left turn panahon nga mu-exit na sa maong memorial park.
Sa susamang dalan, gidili usab ang katawhan nga mu-exit agi sa Santos-Cuyugan road diin muagi na lamang sa Quimpo boulevard.
Sa pikas bahin, ang mga behikulo gikan south paingon sa Davao Memorial Park giabisohan nga gamiton ang dalan sa Quimpo Boulevard ug mamahimong gamiton ang Calamansi St kun ang University Avenue sa Juna Subdivision paingon sa McArthur Highway ug mosunod sa traffic flow sa entrance sa sementeryo.
Gitambagan usab ang mga bus ug truck gikan sa Quirino Avenue nga muliko sa Sandawa Road paingon sa Quimpo Blvd samtang ang mga truck gikan sa Ma-a paingon sa Davao City Overland Transport Terminal (DCOTT) giabisohan usab nga gamiton ang Sandawa Road ug Quimpo Blvd.
Dugang niini, sarad-an ang intersection sa McArthur Highway-Quimpo Blvd panahon sa peak hours sa trapiko.
Samtang ang mga mubyahe padulong Forest Lake duol sa San Pedro cemetery, gimaymay nga gamiton ang Silver St. paingon Copper St. sa San Rafael Village gani kung mupadulong sa San Pedro cemetery mamahimong gamiton ang Jade St. paingon Turquoise St. diin ang parehong agianan mu-exit sa Sarenas Road main gate.
Ang mga behikulo nga pasulod sa Orchard Road giabosohan usab nga gamiton ang laing gate nahimutang duol sa Mason Cemetery isip entrance ug mu-exit sa main gate mismo.
Ruta paingon sa Chinese Cemetery gitambagan nga muagi sa J.P Laurel Road paingonsa dalan sa DMSF kun ang Gahol St dayon liko patoo paingon sa Circumferential Road. Gani gibawalan ang entrance gikan Father Selga Street corner Circumferential Road paingon Catholic Cemetery panahon sa implementasyon sa traffic scheme.
Ug ang mga sakyanan nga mupadulong sa Buhangin Memorial Park mamahimong gamiton ang Carlos P. Garcia Highway corner Milan-Buhangin Cabantian Road diin gibawalan ang pagliko pa-wala gikan sa mga village duol sa Memorial Park.
Segun ni CTTMO chief Dionisio Abude, aduna na silay gipangmongtar nga traffic scheme sa matag major cemeteries aron magiyahan ang mga motorista ug dili matanggong sa dagan sa trapiko.
Tambag usab ni Abude sa katawhan nga patas-an ang pasensya sa byahe ug siguraduhon nga i-check ang gamitong sakyanan aron dili magka aberya ug makasamot sa bug-at nga dagan sa trapiko diha sa kadalanan.
RadyoMaN Jason Amisola
