Ginsiraduhan sang mga katapo sang Bureau of Internal Revenue ukon BIR Revenue District 75 kaupod sa mga pulis ang DLS Supermart sa banwa sang Janiuay kahapon sang aga.
Ini matapos natukiban nga madugay na nga wala nagabayad sang husto nga buhis ang nasambit nga baligyaan.
Ginpaidalom sa napulo ka adlaw nga surveillance ang establisimiento sang bulan sang Setyembre kag sang Oktobre ginserbe sang BIR ang notice to comply apang napaslawan sa gihapon nga magsunod ang tag-iya.
Suno kay BIR Revenue Region 11 director Alberto Olasiman, ang pagpasirado sang establishemento ang kabahin sang Oplan Kandado sang BIR .
Magluwas sa DLS Supermart sa Janiuay, ginpasirado man sang BIR ang sanga sini sa Tagbak, Jaro kag sa banwa sang Pototan.
Ginpahayag naman ni Revenue District officer Josie Lourdes Tang sang RDO 75, ini ang labing una kag katapusan nga oplan kandado operation sa Iloilo subong nga tuig.
Ginpaathag pa sini nga naluoy man sila sa mga empleyado sang DLS Supermart nga temporaryo madulaan sang trabaho subong nga nagahilapit na ang paskwa apang kinahanglan ipatuman ang kasuguan bangod sang pagpakatig-a sang tagdumalahan.
Pahanumdom ni Tang sa iban pa nga taxpayers nga magbayad sang husto nga buhis agud makalikaw sa oplan kandado.
