Davao City – Naisyuhan og citation tickets ug temporary operating permits ang 37 ka mga drivers nga nadakpan sa kapolisan San Pedro human gipahigayon ang Oplan Lambat Bitag Sasakyan dinhi sa syudad sa Davao alas 3 sa hapon kagahapong adlawa.
Subay sa datos sa San Pedro PNP, 15 ang naisyohan og temporary operating permits diin 11 niini ang single motorsiklo ug 4 ka sakyanan samtang 20 ang naisyohan og citation tickets diin 19 niini ang single motorsiklo ug 1 ka sakyanan ug laing 2 ka motorsiklo ang na-impound kapulisan.
Gihimo ang operasyon sa Bucana, Trading Boulevard, Bankerohan, Bacaca road ug San Rafael ning siyudad sa Davao.
Sumala ni Police Chief Inspector Ramil Macampat, ang Station Commander San Pedro Pnp nga gawas sa Oplan Lambat Bitag Sasakyan, mas gipaskusgan usab nila ang gipatuman nga simultaneous joint operation checkpoint ngadto sa ilang Area of Responsibility aron maharang ang mga iligal nga nagabeyahi sa dakbayan aron pagsumbo kun ugaling adunay pagpangatake sa mga dautang elemento.
RadyoMaN Don Pulayao
