Davao City-Dul-an 60 ka mga sakyanan ang naimpound kagahapon samtang kapin 300 ka mga Temporary Driver’s Permit kun TOPs ang naisyu sa gipahigayong Oplan Lambat Bitag Sasakyan batok sa mga malapason sa balaud trapiko diha sa Tugbok ug Calinan area ning siyudad sa Dabaw.
Kini gipahigayon sa Joint Task Force nga gilangkuban sa mga personahe sa Davao City Police Office kun DCPO, DCPO-Traffic Group, City Transport & Traffic Management Office kun CTTMO, Highway Patrol Group kun HPG XI, Land Transportation Office kun LTO-XI, Land Transportation Franchising & Regulatory Board (LTFRB-XI).
Kini ang giingon ni CTTMO Head Dionisio Abude atol sa interbyu sa DXDC RMN Davao kaniya diin base sa natala, dunay kinatibuk-ang 303 Temporary Driver’s Permit (TOPs) ang naisyu, 58 ka mga sakyanan ang temporaryong naimpound sa DCPO parade ground partikularminte ang 54 ka mga motorsiklo, 2 payong payong, 1 multicab ug 1 ka Van.
Dugang niini, sa gipahigayong kampanya kagahapon ug subay sa pagimplementar sa Republic Act 10913 kun Anti-Distracted Driving Act dinhi sa dakbayan, wala silay nadakpan nga milapas sa maong balaud.
Nagsugod ang maong operasyon alas 2 kagahapon sa hapon ug nahuman alas 6:30 sa gabii.
Kasamang Renelyn Barbarona
tags: Mindanao, Davao City, Derecho Balitang Metro Davao, Renelyn Barbarona, City Transport & Traffic Management Office (CTTMO) Head Dionisio Abude
