Davao City – Naguba na ang pagka-independiente sa Korte Suprema gikan sa paggawong sa nasudnong panggobyerno human gipaboran sa walo ka mahistrado ang quo warranto petition nga giduso ni Solicitor General Jose Calida batok sa napalagpot nga Chief Justice Maria Lourdes Sereno.
Gibutyag ni Magdalo Party List Representative Gary Alejano nga ang pagpabor sa walo ka mahistrado sa petisyon ni Calida ug ang aksyon ni Pres. Rodrigo Duterte nagpatay sa judiciary department ug demokrasya sa nasud.
Matud ni Alejano, ang pagtaktak sa puwesto ni Sereno nagpasabot lang nga dili buot ni Duterte nga dunay check and balance diin ang tanang opisyal nga musungag kaniya puniton gayod sa tangkongan.
Sa sinugdanan pa lang nasayod na ang kagamhanan nga dili gyod nila matanggal si CJ Sereno pinaagi sa impeachment busa ang gibuhat nga pamaagi sa gobyerno mao ang pagduso og quo warranto aron mas mapadali ang pagtaktak sa punong mahistrado una paman sugdan sa impeachment trial sa senado.
Segun ni Alejano, pag-atake sa batakang balaud ang pagboto sa walo ka mahistrado diin ang kuyaw niini mao nga ang bisan kinsang opisyal nga gikunsidera nga impeachable officers dali ra matanggal pinaagi sa pagduso og quo warranto petition.
Gipaneguro ni Alejano nga padayong mubarog ug dili magpakahilum ang ilang grupo nga mao ang Tindig Pilipinas sa pakigbatok sa pag-apil-apil sa kagamhan sa judiciary department sa ngalan sa pagpreserba ug pagprotekta sa demokrasya sa nasud Pilipinas.
RadyoMaN Joel Viray
