Davao City – Gitindugan ni Magdalo Partylist Congressman Gary Alejano ang pagsupak sa pederalismo nga sistema sa panggobyerno gikan sa unitary form of government sa nasud.
Giingon ni Alejano nga walay kasegurohan mulambo ang matag lokalidad kung pederalismo na ang Pilipinas inay mugrabe pa hinoon ang kalisod tungod sa kahinay unya sa kalamboan.
Segun ni Alejano nga walay lama sa kamatooran ang gipasiatab sa mga pro-federalism nga mas mudako ang pundo sa matag lokalidad kung magpederalismo na ang Pilipinas.
Dili makasugagod ang lokalidad sa paghatud og kalamboan kung dili manghilabot ang national level pinaagi sa paghatag og internal revenue allotment.
Gihimplo pa ani ang uno porsento nga contribution sa Davao Region sa giremit nga buhis apan ang gibalik sa gobyerno halos lima ka porsento.
Ug kini nagpasabot nga dili makabarog sa kaugalingong mga tiil ang mga lokalidad ilawom sa pederalismo tungod dili naman unya magpakabana ang kagamhanan sa kahimtang sa lokal.
Dili kumbinsido si Alejano sa gipasiatab sa mga pabor sa pederalismo nga masulbad na ang mga problema ug suliran sa Pilipinas sama sa krimen, droga, terorismo, ug daghan pang uban.
Dugang pa sa opisyal nga kumplikado ang sitwasyon sa Pilipinas ug dili sayon sulbaron ang mga problema sa Pilipinas.
Busa makuti nga pagtuon sa pederalismo ang angay himoon ayha ilisan ang kasamtangang sistema sa panggamhanan sa Pilipinas.
RadyoMaN Joel Viray
